Repanse Ekonomi Ayiti a

Resous Ayiti genyen ki plis mezirab aktyèlman se prezans kominote dyaspora ayisyen ki ap pran elan ekonomik nan anpil peyi ki nan alantou a sitou Etazini ak Kanada. Relansman devlopman Ayiti dwe nesesèman entegre pouvwa ekonomik dyaspora a nan tout sektè ekonomik peyi a.

Pouvwa acha dyaspora ayisyen ki Etazini an sèlman depase tout ekonomi ayiti a konbyen fwa. Lajan ke dyaspora a voye bay fanmi ak zanmi an Ayiti preske rive 4 milya dola ameriken. E si peyi a ta founi dyaspora a yon pòsyon nan byen ak sèvis ke dyaspora a ap konsome? Tout estimasyon ki fèt endike ke dyaspora ayisyen ki Etazini an sèlman kapab enjekte prèske 8 milya dola ameriken nan ekonomi Ayiti a chak ane.

PBA vize sekte sa yo pou ankouraje envestisman manm dyaspora a, etranje ki vle, ak sitwayen ki ap viv andan peyi a:

Devlopman touris - Se vre tout plan devlopman Ayiti mande pou devlopman touris. Sepandan, majorite ladan yo pa pran an konsiderasyon imaj domaje ke peyi a genyen aletranje. PBA pa panse etranje pral kouri vini Ayiti si nou konstwi yon dal otèl ak netwaye kèk plaj!

Estrateji PBA pou devlopman touris se sible nan yon premye tan manm dyaspora aysiyen an ki bezwen rekonekte ak peyi a, answit pwogresivman fe pwomosyon Ayiti tankou yon patwimwàn monn nan akòz istwa inik li pou atire yon klas touris ki kapab ede chanje imaj peyi a.

Pou kesyon ensekirite ki kapab dekouraje moun antre nan peyi a, vizite Plan Sekirite nou.

Endistriyalizasyon ak Teknoloji - Nan tèm ekonomi laj endistriyalizasyon pa fini. Avèk yon popilasyon jèn, li se yon nesesite pou Ayiti lanse pwodiksyon nasyonal li pou kreye travay, reponn ak bezwen byen ak sèvis andan peyi a, epi antre nan konpetisyon sou mache entènasyonal la.

Plan PBA pou acheve sa enkli:

• Kreyasyon konpayi ak atelye pilòt ankouraje envestisman prive
• Lansman yon mache nasyonal anliy ak nan lokalite kle nan dyaspora ak an Ayiti pou pwodui lokal
• Mete fon disponib pou ankouraje entrepreneurship

Pou ankouraje envestisman nan byen prive ak piblik, li enpòtan pou leta ayisyen travay ak enstitisyon finans lokal e etranje pou garanti envestisman prive, etabli lwa ak fòs pou pwoteje byen kont zak kriminèl ak abi, modènize lwa finans yo pou ankouraje patisipasyon tout ayisyen nan devlopman peyi a.

Youn nan antrav ki aktyelman ekziste se mank konfyans nan leta ayisyen pou pwoteje byen ak ofri soulajman finansye imedya pou envestise. Se pou sa, PBA pwopoze yon solisyon ki enkli:

• Mete fon disponib pou garanti envestisman nan sektè kle ekonomi an tankou pwodiksyon nasyonal, devlopman enfrastrikti, touris, ak kominote retrèt.
• Kreye yon ajans pou pouswiv krim kont pwopryete prive ak piblik tankou vòl ak sabotaj.
• Modènize lwa komès peyi a pou bay tout envestisè an Ayiti ooubyen nan dyaspora a menm dwa devan lajistis.

Lòt difikilte ki kapab dekouraje manm dyaspora a pou envesti an Ayiti se perèz pou koripsyon ak kontinyite nan tout pwogram avan yo pou devlopman an Ayiti. PBA konprann ke istorikman Ayiti pa janm devlope kondisyon ki favorab pou envestisman prive ayisyen oubyen etranje. Sepandan avèk transparans ke bank lokal ak bank entènasyonal pral ofri, tout envestisè potansyèl kapab asire yo lajan yo envesti an Ayiti ap garanti nan yon enstitisyon finansye nan peyi kote yo ap viv la.